नाशिक : देशाला चलनी नोटांचा पुरवठा करणाऱ्या नाशिक रोड येथील नोट प्रेसमध्ये सध्या २० रुपयांच्या नोटांच्या छपाईचे काम मोठ्या प्रमाणावर सुरू आहे. वीस रुपयांच्या नव्या नोटा ‘स्टेट बँक ऑफ इंडिया’मध्ये ग्राहकांसाठी उपलब्ध झाल्या असून, दीपावलीत लक्ष्मीपूजनासाठी या नोटा नेण्याकरिता ग्राहकांनी गर्दी करायला सुरुवात केली आहे.
स्टेट बँकेच्या नाशिक रोड येथील दुर्गा उद्यानासमोरील शाखेत ग्राहक, खातेदारांना जुन्या नोटा देऊन नवीन नोटा घेता येतील. काही हौशी ग्राहकांनी या शाखेतून वीसच्या नवीन नोटांचे बंडल घेतले आहे. नव्या नोटांचे लक्ष्मीपूजन करण्यासाठी महिला, नोकरदार वर्ग आणि व्यावसायिक सध्या या नोटा मिळवण्यासाठी प्रयत्नशील आहेत. त्यामुळे स्टेट बँकेत गर्दी दिसत आहे.
नाशिक रोड येथील प्रेसमध्ये दहा, वीस, पन्नास, शंभर आणि पाचशे रुपयांच्या चलनी नोटांची छपाई होते. छापल्यानंतर त्या रिझर्व्ह बँकेकडे पाठवल्या जातात. तेथून त्या स्टेट बँकेमार्फत देशभरात वितरित होतात. वीस रुपयांच्या नव्या चलनी नोटा वेळेत छापण्याचे आव्हान प्रेस कामगारांनी पूर्ण केल्यामुळे त्यांच्यामध्येही समाधानाचे वातावरण आहे.